بعد التصريحات النارية في برنامج "كلمة أخيرة" الذي تقدمه "لميس الحديدي" على قناة "ON"، يعود اسم شيرين عبدالوهاب وحسام حبيب للواجهة.
اعتذرت شيرين عبد الوهاب للجمهور عن كل "الكلام الإيجابي" التي قالته في الفترة الأخيرة في حق حسام حبيب قائلة: "عاوزة أستغفر ربنا على الكذب اللي كذبته عشان أخلي صورة إنسان تبقى كويسة وأنا كذبت ودي أكتر حاجة ربنا مبيحبهاش".
وأضافت عبد الوهاب: "كدبت في حاجات كتيرة أوي لأني بنت أصول وكنت عاوزة أرفع صورة إنسان ممكن يروح في يوم من الأيام يتجوز من عيلة تانية وأخلص منه ولو كنت قلت كلام وحش وقتها مكانش هيعرف يتجوز وأنا نفسي يتجوز ويبعد عني".
وتابعت: "أنا ست قاعدة في أمان الله مع بناتي بقالنا 4 سنوات شايفين الويل سافرنا الساحل وقلنا نقعد أربع أو خمس أيام ونرجع مبسوطين وتتحسن نفسية البنات ونفسيتي ومكناش بنخرج ومكناش عايشين تقريبًا والبنات مكنوش بيعرفوا يقعدوا معايا، لأني كنت عايشة مع زوج مش بيشتغل تقريبًا وكنت محبوسة 24 ساعة في أوضة نومي مش بعمل حاجة، قاعدة بس وأنا غلطت في حق نفسي، وكنت فاكرة أني بحافظ على بيتي لكني اكتشفت أنه مكانش بيت، كانت عيشة فئران أو مصيدة أنا كنت زي الفار اللي بيدخل المصيدة ياكل حتة جبنه".
واستكملت قائلة: "كنت عايشة مع راجل مش بيشتغل ولا بيخرج ولا بيشوف أهله ولا أصحابه وكل همه حب الامتلاك ومع ذلك فضلت جمبه وهو لايعرف إلا فكرة حب الامتلاك وصبرت لأني كنت بحاول أنجح الحب ده ومكنتش بحب أتهزم وأنا بطبعي أكون خدامة الرجل اللي أعيش معاه".
وصرحت شيرين بان حسام كان يعتدي عليها بالضرب وهو السبب وراء حلقها شعرها "حسام كان بيضربني ويسحلني وحلقلي شعري من الضغط النفسي اللي كان معيشني فيه جالي الفور سيزون بالمأذون وكان عاوز ينزلني بقميص النوم وكنت بصرف عليه وعلى أهله واستغل وجودي إمبارح الأتنين في الساحل وراح سرق عربيتي".
ومن جانبه، توجه حسام حبيب برسالة صوتية يرد عليها من خلال "ET بالعربي" مؤكداً أنه سيلجأ للقانون والاثباتات للرد في الوقت المناسب.
وقال حبيب في التسجيل "أكيد هيبقى في إجراء قانوني أنا عمري ما دافعت عن نفسي وعمري ما أتكلمت وده كلام كله مرسل وأنا الكلام اللي هرد بيه إنشاء الله كلام كله موثق ومش هقول كلام مرسل".
وأضاف: "كل حاجة دلوقت بحضرها حفاظاً عليها وعلى سمعتها وعلى بيتها يعني مكنتش بتكلم بس دلوقت هتكلم هضطر أتكلم طبعا هضطر إني أتكلم علشان الكلام بقى زيادة أوي بس أنا مش هطلع أتكلم كلام مرسل أنا هطلع أتكلم كلام بحقايق وبوثائق علشان أنا مش بعرف أقول كلام مرسل أتحاسب عليه ولا أفتري على حد".
وختم حديثه قائلًا : "سأرد بوثائق تثبت ده كله تهديد وابتزاز بتهدد دايما بجمهورها بس أنا إجراءاتي قانونية وبرضه ردي في الإعلام هيبقى بحقائق لن استعجل وسأرد قانونيًا بالمستندات".
